ચાલો... આપણા ઘોઘારી દશા શ્રીમાળી વણિક સમાજનાં ઈતિહાસમાં આળોટીયે...

   ઉત્ક્રાંતિ કાળથી જ માનવજાતિનું સર્જન સતત પરિવર્તનશીલ રહ્યું છે. જંગલી દશાના જીવનમાંથી સમયના સથવારે જરૂરિયાતો પ્રમાણે કુટુંબો, ગામો અને નવા સમાજનું નિર્માણ થયું. કાળક્રમે અરસપરસ સહકાર, સંગઠન સાથે અરસપરસને ઉપયોગી થવાની ભાવનાનો વિકાસ થયો. વિચારસરણીમાં વિવિધતાને કારણે જે વિવિધ જૂથો રચાયા અને તેમાંથી વિધ વિધ જ્ઞાતિઓમાં રૂપાંતર થયું અને પલ્ટાતા પ્રવાહના વહેણમાં આપણા ઘોઘારી દશા શ્રીમાળી વણિક સમાજનું સંગઠન રચાયું.

   આપણા સમાજનાં ઈતિહાસની માહિતી મારવાડ પ્રાંતમાંથી મળી આવે છે. આપણું ઉત્પત્તિસ્થાન મારવાડના ભીમપાળ, શ્રીપાળ, ઓશીયા અને ચિતોડમાંથી મળી આવે છે. કાળક્રમે જરૂરિયાત ઊભી થતાં આ જૂથો પૈકી કેટલાંય લોકો અલગ અલગ જગ્યાએ સ્થળાંતર થયા. ભીમપાળ અને શ્રીમાળ પ્રાંતમાંથી આવ્યા તે "શ્રીમાળી" કહેવાયા. આગળ જતાં શ્રીમાળીમાંથી દશા અને વિશા એમ બે ભાગમાં રૂપાંતર થયું. આપણે બધા દશા શ્રીમાળીના છત્ર નીચે એક થયા.

   આપણા બંધારણ મુજબ ગોહિલવાડ વિભાગના દસ તાલુકાનાં વિકાસની યાત્રા પર વિહરતા કુટુંબોના લોકો વિકાસની યાત્રા પર વિહરતાં વિહરતાં મુંબઈમાં વિવિધપરામાં સ્થાયી થયા કે જે આગળ જતાં "શ્રી ઘોઘારી દશા શ્રીમાળી જ્ઞાતિનાં" નામે પ્રસ્થાપિત થયા. આપણા ઉપરોક્ત સમાજમાં જુદા જુદા દસ ધાર્મિક સંપ્રદાયો જેવા કે વૈષ્ણવ, સ્વામિનારાયણ, સ્થાનકવાસી જૈન, દેરાવાસી જૈન વગેરેનો સમાવેશ થાય છે. ઉપરોક્ત ઘોઘારી દશા શ્રીમાળી વણિક સમાજમાંથી લગભગ ૧૫૦૦ કુટુંબોમાંથી ઘણો મોટો સમુદાય ઘાટકોપરમાં સ્થાયી થયો.

   મુંબઈનું ઉપનગર ઘાટકોપર એટલે એક પવિત્ર પૂણ્યભૂમિ જ્યારે જ્યારે ઘાટકોપરમાં આપણે સંચરીએ ત્યારે આપણને એક નાનકડા ગોહિલવાડનું સાક્ષાત દર્શન થાય છે. ગોહિલવાડની માફક જ ટેકરીયાળો વિસ્તાર કે જ્યાં ઊંચી નીચી ઘાટીઓમાં છવાયેલી ધરતી. ઘાટકોપરમાં સ્થાયી થયેલા આ ગોહિલવાડ દશા શ્રીમાળી વણિક સમાજના કેટલાક હોંશીલા આગેવાનોના મનમાં એક સ્વપ્ન પ્રગટ્યું. આપણું પણ એક મંડળ હોય... આપણી પોતાની વાડી હોય... આ વાડીનાં પ્રાંગણમાં આપણાં શુભપ્રસંગો ઉજવાતાં હોય તો ઘાટકોપરની ભૂમિ પર આપણે એક નાનકડું "ગોહિલવાડી સ્વર્ગ" ખડું કરી શકીએ.

   આવા સ્વપ્નની આકાશી ધરતીમાં ગુલતાન કરતાં કરતાં આ અગ્રણીઓએ સ્વપ્નને સાકાર કરવાના પ્રયાસો આદરી દીધા. આ સ્વપ્નને મૂર્ત કરવાનો પ્રથમ પ્રયાસ કરનાર હતા: શ્રી નારણદાસ લક્ષ્મીચંદ દેસાઈ, શ્રી કુંવરજી વલ્લભદાસ સરવૈયા, શ્રી નંદલાલ મણિલાલ મહેતા વગેરે.

   આ મહાનુભાવોએ આપણા અનેક જ્ઞાતિ બંધુઓને આમંત્રીને એક મીટીંગ બોલાવી. આપણા સમાજને માટે વર્ષ ૧૯૩૫માં શ્રી ઘોઘારી દશા શ્રીમાળી મિત્ર મંડળને નામે નવો સૂર્યોદય થયો. મંડળની સ્થાપના સમયે લગભગ ૬૫ (પાંસઠ) સભ્યો હતા. ઉત્તરોત્તર સંખ્યા વધતા આજીવન સભ્યપદનો આંકડો ૧૯૦૫ સુધી પહોંચી ગયો. વરસો વીતતાં તેમના કેટલાંય સભ્યો પ્રભુના ધામમાં સ્થાયી થયા. આજ તા. ૧-૪-૨૦૧૭ના હાલમાં કુલ ૧૬૦૦ (સોળસો સભ્યો)ને માતબર પરિવાર બની રહ્યો છે.

   આ મહાનુભાવોએ આપણા અનેક જ્ઞાતિ બંધુઓને આમંત્રીને એક મીટીંગ બોલાવી. આપણા સમાજને માટે વર્ષ ૧૯૩૫માં શ્રી ઘોઘારી દશા શ્રીમાળી મિત્ર મંડળને નામે નવો સૂર્યોદય થયો. મંડળની સ્થાપના સમયે લગભગ ૬૫ (પાંસઠ) સભ્યો હતા. ઉત્તરોત્તર સંખ્યા વધતા આજીવન સભ્યપદનો આંકડો ૧૯૦૫ સુધી પહોંચી ગયો. વરસો વીતતાં તેમના કેટલાંય સભ્યો પ્રભુના ધામમાં સ્થાયી થયા. આજ તા. ૧-૪-૨૦૧૭ના હાલમાં કુલ ૧૬૦૦ (સોળસો સભ્યો)ને માતબર પરિવાર બની રહ્યો છે.